EVANGELINOS MISAILIDIS’İN VEFATI (16 OCAK 1890)
Karamanlı basının en önemli gazetelerinden biri olan Anatoli Gazetesi’nin sahibi Evangelinos Misailidis’in Miladi takvime göre 16 Ocak 1890’daki vefatı sonrasında Anatoli dahil pek çok dönem gazetesinde (Tercüman-ı Hakikat, Sabah) hakkında övgü dolu ve hayatını ya da kişiliğini anlatan yazılar yayımlanmıştır. Bu yazılardan Anatoli hariç her biri normal baskı içerisinde bir bölümü Misailidis’e ayırırken, Anatoli tek bir sayfa baskı (normalde dört sayfa çıkmaktadır) ile yayın yapmıştır. Anatoli’nin 21 Ocak 1890’daki baskısında yer alan metin (düzeltmeler [ ] içerisinde kalın olarak yazılmıştır) şu şekildedir:
EVANGELINOS MISAILIDIS
Bir vakıtdan berü muhib pederimiz Ev. Misailidis ef. mubela [mübtela] olduğu maraz-ı kalbiden (kardiakon) şifayab olamayarak, işbu 1890 senesi Ianouáriosının üçüne müsadif çeharşenbe (Tetárti) akşamı terk-i dağdağa-i âlem-i fani eylemişdir.
Ömrünün son saatlarında mübarek iki ellerini evlat u ayali üzerine vaz ile, hayır dualerini virerek, ve muhib-i vatan ve vatantaşanını yad u zikr iderek itmam-ı nefes eylemişdir.
[Baskıda bu bölüm okunabilir durumda değildir] ... bir söz söyleyemediği halde, yalınız taleb-i imdad ve muavenet idercesine, taşları eridir bir tarz-ı can feza ile, mütemadien sağına soluna ihale-yi atf-ı nazar idib oh! öf! deyerek, faniliği malum, fakat terk-i müşkül olan şu alemden ebediet ömüre hicret üzere hazırlandığını, irae itmekde idi.
Gözlerini hazin hazin, ve helecan-ı azim ile açıp kapayarak hayal hane-yi hatırımızdan asla çıkamayacak bir teesir ile, selam-ı meeyusiet encamını virerek Elveda ey dar-ı fena! Ey evlad-u iyalim! Bunca muhib dostlarım, elveda!!! deyerek, gicenin saat 3 buçukda ve 70 sini saliminde acı acı teslim-i ruh eylemişdir.
Naaş- ı mayferet [mağrifet] nakişları (leipsanosi) küllietlü halk arasında ihtifalat-ı faika ve merasim-i layıka ile, makam-ı dehşet intimasına cumaa (paraskeví) günü saat sekiz sularında defn-ü ilka idilmişdir.
Merhum pederimiz elli seneden berü İzmür ve Stambolda gazetacılık ile meşgul olub, hakikatlü Vatandaşlarının saadet u refah-ı maddi ve manevi terakkisi, ve ulum-i finunle tenvir-i ezhan eylemeleri, esbabının istikmali içün, güna gün fedakarlığı diriğ itmeyerek, ve bunu bir vazife-i mukaddese add iderek ta son nefesine kadar kalen kalemen nüfuzunu, gözlerinin nurunu hülase kuvve-i maddie ve manevisini bu uğurda sarf, ve şu maksad-ı hayrisinin husuline istimal itdiği cümlenin malumidir. Ulûm u finun tarîk-i terakkide henüz bu günki mesafeyi kat idememiş olduğu bir zeman, ve gazetanın fevaid-i azime ve dilemeyen bir ande, bil hassa Anatol namına matbaa küşad iderek, vatandaşlarının anlayıb istifade idebileceği suretle, ve vakt-ü zemanın ihtiac ve gösterdiği lüzume göre nice nafi kitaplar, faide bahş risaleler tab-u temsil ile meydan-ı istifadeye arz vaz eylemişdir.
Binâen-aleyh boş günki gün deryâ-yı kedere gark ile kareler geyinmiş [karalar giyinmiş] olan şu «ANATOLİ» gazetasını dahi ihdâs, ve o vasıta ile Devlet ü Millete sıdk u istikametle hidmet [hizmet] itmiş ve buna mebni metbû mufehhamımız veliy-i nimet bi-minnetimiz Padişah âlicah efendimizden, rütbe-i sânie ve muahıren dördünci Mecidî nişân-ı zîşânı ile, mazhar-ı taltifi olmış, ve Yunan Devleti fehimesi tarafından dahi Sotiros Hristu nişanı ile hüsn-i hidmeti [hizmeti] tahsin ve takdir olunmuşdur.
Gazetacılık meslek-i nazikesine başlayalı, yarım karn olmuş yani bu sene ellinci senesine kadem basmış bulunduğundan usul-ü meriesine tevfikan (Iovilaíon) yani yevm-i mahsusunu terakkiperver hemşehrileri şerefine olarak şaşaalı bir suretde icrasını tasmim tasavur itmekde iken, takdir-i illahi bu ya, felek Mustafaya yâr olmayub, kendisinin iştiakle arzulediği öyle bir cemiyet-i fevkeladeyi hal-i hayatında görmek nasib olmamış isede, bi-ruh ve la-hıs olan ceseti görebilmişdir.
Cümle indinde maalum ve müsellem olduğu üzere merhum peder pala terimiz hilkaten rahim, ve tappan [tab’an] halim, dünya maline nazar-ı itibarle bakmaz, kanaatkar bir zat-ı cemil ü sıfat oldığından evlad u iyâlinin istikbalini teemine kafi gerçi servet bırakmamış isede kırk elli senede ellerinde(?) meydana getürdiği bunca kadirşinas makam-ı kardaş dostlarını, ve sevkili müşterilerini terk itmişdir. Bunların kadr ü kıymetleri indimizde hazinelerden evladır. Şimdiye kadar merhum pederimize olan teveccüh ve muhabbetleri biz fakir evladlarına intikal itdiği ile müteselli ve müteşekküriz.
Pederimizin vefatı akabinde, umûm Anatolular menevi peder ve ihtiar hocalarını zayi itiklerinden dolayı, cidden his itdikleri keder ve eseflerini alena göstermişlerdir. Saç-u sakalını faideleri uğrunda ağartmış bir pir-i gayret güzar-ı emekdarlarına vacib olan taazim u tikrim-i vacibi üzere ifa iderek, derece-yi hamiyet ve nezaketlerini umûma karşu sermaye-yi iftihar olabilecek bir tarz-ı halisanede irae itmişlerdir. Sağ-u varolunlar. Heman cenab-ı hak cümlesine, istirahat-ı bal ve refah-ı hal ile uzun ömürlü olmak muvefakiyetini ihsan eyleye.
Pederimizin tercüme-yi halini, ve cenaze alayı resminin suret-i vukuını, ve hörmeten irsal olunan stefanalarını hanki mahal ve epitropiler tarafından, irsal ve kimler vasıtası ile takdim olunduğunu, ve Patrikhane kelisasında ve defn olunan Eğri Kapu kapristanında irad olunan nutklar ile teferruat-ı sairesini, hasseten bir risale şeklinde tab iderek, umûm muhterem Müşteri ve dostlarımıza merhumun son yadigarı olmak üzere takdim, ve gördiğimiz muamele-i teveccühkaraneden dolayı her birerine familiamızın teşekkürat-ı bi-gayatının risale-i mezkurede dahi ifa ideceğiz.
Gazetamızın balasında [başlığında] görülmekde olduğu üzre bundan akdem idaresini bizlere ihale iderek, kendüsi yalınız bir nazaret itmekle kifayet itmekde idi. İşte bundan böyle kal-i evvel gazetanın neşrine muntazamen devam, ve rağbetlü muuteber müşterilerimizin her cih[edde] memnunietlerinin istihsaline can siparane say-u ikdam ideceğiz.
İrtihali dar-ı baka iden hörmetlü peder-i azizimizin zikri behiyeleri içün üzerimize farz olan matem müddeti her ne kadarda uzun olacak isede, müşteri-i kiramımızı havadissiz bırakmamak içün girecek [gelecek] haftadan itibaren gazetamız kemafi’s-sabık muntazamen neşre başlayacakdır.
1890 Ianouários 9
Theagenis E. Misailidis
Hristos E. Misailidis
Anastolos E. Misailidis
Georgios E. Misailidis
Yorumlar